மன வாசனை

நித்தம் சந்திக்கும் காபிஷாப்
அதே மூலையோர மேசை 
எதிரெதிராய் அவனும் அவளும் 
இரண்டு பக்கமும் மௌனம்
பரிசுகள் இடம்மாறின உணர்வுகளற்று
கடிதங்கள் ஒன்றொன்றாய் கிழித்தான்
வாழ்த்துஅட்டை பார்க்காமல் அழித்தாள் 
கைகுலுக்காமல் விடைபெற்று 
வீதியில் இறங்கி நடந்தனர்.
எதிர்பாராத மழை எங்கிருந்தோவர 
இருவர் மனதிலும் சந்திப்புகளின்
வாசனை.

அவனாலா?

அன்னம் மறந்தேன் அவனாலா?
அன்னம் பிடிக்காமல் ஆனதாலா?

இடைமெலிந்து ஆனது பாதியா?
இல்லையிது காதல் வியாதியா?

கைவளை தனியே போனதா?
இல்லையிது பசலையால் வந்ததா?

உயிர்மூச்சில் உன் வாசமா?
உன் சுவாசத்தின் மீதமா?

உதட்டின் ஓரம் மச்சமா?
உன் முத்தத்தின் மிச்சமா?

கண்மூடி உனைகாண்பது கனவா?
காதல் செய்த நினைவா?

உயிர் வாழ வழியிருக்கா ?

ஓடி பிடுச்சு வெளையாடி
விழுந்து உராய்ந்த புண்ணுக்கு
எச்சிமண்ண உனக்கு தடவுனப்ப
கொஞ்சம் மனசும் சேர்ந்து வந்திருச்சு

ஊர்க்கருப்புக்கு யாரோ ஒடச்ச
செதறு தேங்காசில்லுல ஒட்டுனமண்
ஊதி உனக்கு கொடுத்தப்ப
கொஞ்சம் உசிரு ஒட்டிகிட்டு வந்திருச்சு

கஞ்சி காச்சி வெளையாண்ட
கதவு இல்லாத வீட்டுக்குள்ள
ஒன் காலடித்தடம் பதிச்சப்ப
கொஞ்சம் உறவும் கூட வந்திருச்சு

சாமி ஊர்சுத்தி வந்தப்ப
மாவிளக்கு வெளுச்சத்துல மங்கலா
ஒன் மொகம் பாத்தப்ப
கொஞ்சம் கிறுக்கும் பிடுச்சு போச்சு

பச்சஓல இடுக்கு வழி
ஒன் கண்ண பாத்தப்ப
மிச்சம் மிதம் இருந்த
கொஞ்சம் நஞ்சம் உசிரும் போயிருச்சு

உயிர் வாழ வழியிருக்கா ?
நீ வந்துசேர மனமிருக்கா ?
வெறும் கூடுதான் இங்கிருக்கு
கொஞ்சம் கொஞ்சமா போனதெல்லாம்
கொண்டு வந்து சேப்பியா ?

முன்னால் காதலன்

அவன்
தாடியுடன்
நான்
தாலியுடன் ...

அவன்
என் காதலுடன்
நான்
என் கணவனுடன் ...

அவன்
அவனாகயில்லை
நான்
இவனானதால் ...