மாற்றுப்பாதை

மலைபாதை எப்போதும் அழகே
மாற்றுப்பாதைக்கு மனம் ஏங்க
இடையில் மெல்ல ஊர்ந்து
குறுக்கு வழி நகர்ந்தால்
காடு கருப்புநிற காடு
மூச்சுமுட்ட கண்கள் மூடி
மடலின் பின்னே இளைப்பறி
சமவெளியில் தடம் பதித்து
மெல்ல கடந்த இதழ்கள்
இதழ்களில் சிக்கி தவித்து
இடம் பெயராமல் அங்கே நின்றது.

பம்பர பெண்கள்

அழகு அழகாய் பம்பரம் 
இறுக்கி சுற்றி சுற்றி வந்தது 
சாட்டை.

சுழற்றி விட்டதில் 
சுற்றி தலைகுனிந்து விழுந்தது 
பம்பரம்.

பம்பரம் பார்த்து சிரித்து
கேலி பழி சொன்னது
வேடிக்கை பார்த்த
கூட்டம்.

கலர் கலராய் வேறு பம்பரம்
சுற்றி சுழற்றி விட்டது
அதே சாட்டை.

அடுத்த அடுத்த பம்பரம்
வேறு வேறாய் பழி கேலி
பம்பரத்தின் மீது.

கேலி பழி பாதிப்பதில்லை எப்போதும்
சாட்டைகளை
ஆண்களை போல்.

இவர்களும் நானும்

இவர்களும்  நானும்

இதுவரை காணாத கடவுளை

கண்டால் சில வரங்கள் கேட்பேன்

நினைக்கும் நேரத்தில் உங்களை

வந்தடையும் விண் வழி கேட்பேன்

கண்மூடி திறக்கும்முன் உங்கள்முன்

நிற்கும் நொடிவிமானம் கேட்பேன்

கூட்டத்தில் மற்றவரிடம் இருந்து

மறையும் தந்திரம் கேட்பேன்

சேர்ந்திருக்கும் நேரம் அப்படியே

உறையும் சூத்திரம் கேட்பேன்

விரும்பும் மட்டும் உங்களுடன்

விளையாடும் மந்திரம் கேட்பேன்

நாம் மட்டும் பேச

சொந்தத்தில் மொழி கேட்பேன்

உங்களை மட்டும் காண

மூன்றாம் விழி கேட்பேன்

வராத கடவுள் வருவாரா?

கேட்கும் வரங்கள் தருவாரா?